طب حضرتك عارف الأول إيه الفرق بين المعاق والسوي قبل ما تحكم؟
خليني أقولك إن الفرق مش كبير خالص، الفرق بس فى درجة الصفة اللي حصلت فيها الإعاقة مش أكتر
المعاق زي السوي بالظبط له مشاعر وأحسايس، وبيفكر، وبيتعاطف مع اللي حواليه، وبيتفاعل.. طبعاً حسب شدة الإعاقة، بل كمان بتحصل للمعاق مشاكل نفسية بسبب انطباعات الناس عنه، وبيحس بمشاعر متقلبه تجاه نفسه واللي حواليه!
دا بجد 😳
آه طبعاً.. حتى لو كانت الإعاقة عقلية، كل ما بيعلى إدراكه كل ما بيبقى له مشاكل نفسية أكتر، حتى لو مش قادر يعبر عن دا بالكلام؛ ولكن بتلاحظ إن سلوكه ساعات بيقل، بيبقى عصبي أكتر، موده بيتقلب. معظم الناس ما بتبقاش عارفة المشكلة دي ليه، ولكن المشكلة ساعات كتير بتكمن في إنه بدأ يحس إن هو في مشكلة وتسوء نفسيته.
طب المفروض کوَلي أمر أعمل إيه؟
إني أقف جنبه وأدعمه وإني أفكر إيه اللي أعمله عشان يقوم بدور فعال اتجاه رعاية نفسه، وإنه يعتمد على نفسه شوية شوية؛ يعني أخليه يقوم بكل أدوار الرعاية بنفسه، ما يعتمدش عليا، وما تبصلهوش بنظرة شفقه لإنه بيحس بالنظرة دي وبيتأثر بيها
أعمل كل ما بوسعي له، وأساعده إنه يتعلم.. حتى لو كانت شدة الإعاقة عالية، وما استفدش كتعليم، بس على الأقل هينمي قدراته العقلية وهتزيد خبرته في الحياة
ودا هيقلل شعوره بالدونية، وهيساعده يفهم نفسه أكتر ويتأقلم ويعرف إيه اللي المفروض يعمله
دلوقتي في مدارس كتيرة أوي فكرية كويسة، وفي كمان مدارس للدمج
وفي مؤسسات لذوي الاحتياجات الخاصة؛ لرعايته، وكمان بتعلي مهاراته أكتر وأكتر
ولو في إمكانية لإنه ممكن يلعب رياضة.. يا ريت! لإنه طفل زي أي طفل، حقه يعمل كل حاجة، يمكن مش هيعملهم كلهم مرة واحدة في وقت واحد، لكن مع التدريب هيعملهم واحده واحده، وهيفوق توقعاتك كمان عنه.
كتبت الأخصائية النفسية/ يارا خالد رشوان. تم نشره في 1 يونيو 2025م
