اهرب لو فهمك في الجلسات الاولى أو في الاعلانات بتاعته أنه عنده الحل الأكيد.
اخلع لو حددلك رقم معين للجلسات هتتحسن بعديه.
اهرب لو قالك ان عنده طريقة علاج سواء بالكلام او بالدواء او باي خزعبلات تانية نتيجتها مضمونة وأكيدة 100%.
كلامي محبط ؟؟ مش مهم.
المهم اننا نعرف الحقيقة.
لان دلوقتي بشوف اعلانات كتير اوي بتتكلم عن حتمية تحقيق نتائج خرافية ، ومهم اننا نعرف ان دلوقتي اي حد بقى يشتغل اي حاجة ، ومن ضمن الحاجات دي العلاج النفسي.
اي حد دلوقتي بقى يقول على نفسه معالج نفسي وهو خريج هندسة او تجارة مثلا.
طيب المهم .. الى جانب انك محتاج تتأكد من الشهادات والمؤهلات ، محتاج تخلي بالك مما يلي:
مافيش أخصائي نفسي حقيقي أو طبيب نفسي حقيقي هيقولك انه ضامن انك تتحسن بنسبة 100%
مافيش معالج نفسي حقيقي هيقولك انت هتتحسن بعد عدد جلسات معين.
مافيش معالج حقيقي هيوعدك في الجلسات الاولى انه هيحللك كل مشاكلك وامراضك.
اللي بيعمل كدة الناس المدعين فقط ، واللي بيلجأوا للهيصة والوعود اللامعة ، واللي بيعرفوا يعلموا البحر طحينة.
وده لأنهم ببساطة جهلة ومش فاهمين أبسط قاعدتين في العلاج النفسي.
القاعدة الأولى : مش كل الناس استجابتها زي بعض. لان استجابة الانسان ليست الية ولا ميكانيكية ، يعني مافيش طريقة علاج واحدة مضمونة لكل الناس. ودي قاعدة في منهج علم النفس في ثانوية عامة أصلا (مش سر يعني)
القاعدة الثانية : ان العلاج النفسي قائم على التفاعل بين المعالج والمريض ، والتفاعل ده ماحدش يقدر يتوقع هيمشي ازاي.
المعالج النفسي الحقيقي والشاطر ، هو اللي هيشرحلك اسلوبه العلاجي ، وهيقولك على المؤشرات اللي انت محتاج تخلي بالك منها علشان تعرف اذا كان العلاج بيجيب نتيجة ولا لا.
المعالج الشاطر هيقولك انك احتمال تحتاج مدى معين من الجلسات من كذا الى كذا ، من غير ما يذكر رقم محدد.
المعالج الشاطر بيستدم أساليب علاجية محددة ومعروفة ولها أبحاث علمية منشورة في دوريات علمية محترمة وموثوق فيها على مستوى العالم.
المعالج الشاطر هيحاول يشجعك أكتر ما هيحاول يبهرك.
فأي حد يحاول يبهرك في أول العلاج .. اهرب
