الابتزاز العاطفي

عمرك سمعت عن
الإبتزاز العاطفي ؟

لو ما سمعتش   فالإبتزاز العاطفي هو تكنيك ممكن يستخدمه الناس إللي حوالينا عشان يأذونا أو يلعبوا بمشاعرنا سواء كان بقصد أو من غير قصد .. الإبتزاز العاطفي بيحصل لما حد يستخدم ( نقط ضعفنا ، أسرارنا ، مشاعرنا ....إلخ ) عشان يتحكم في سلوكياتنا أو يقنعنا بوجهه نظره عشان نعمل إللي هو عاوزه مننا.

د #سوزان_فوروارد في كتابها الإبتزاز العاطفي أكدت إن الإبتزاز العاطفي واحد من الأشكال الفعاله جدا في التلاعب إللي بيهددنا فيه المُقربين منا بشكل مباشر أو غير مباشر عشان يعاقبونا لو ما عملناش إللي بيطلبوه و إتكلمت في الكتاب إن الإبتزاز ده بيمر بمراحل محدده:

الطلب: أول مرحله بيطلب فيها الشخص إللي عاوزه منك بشكل صريح أو متخفي ( و أحياناً ممكن يظهر ليك الموضوع من بعيد علي إنه إهتمام بيك ؛ لكن الحقيقه إنها محاوله للسيطره و التحكم فيك )  

المقاومه: ثاني مرحلة إنت بتبدأ فيها تقاوم رغبه الآخر للتحكم فيك، بمجرد ما تعبر عن مقاومتك المبتز هيضغط عليك عشان تلبي له مطالبه ( لو بتحبني بجد ؛ وافق علي طلبي)

التهديد: ممكن تكون مباشره أو غير مباشره الطاعه في المرحله دي ممكن توصل لإنك مش عاوز المبتز ينفذ تهديده فتستسلم لأوامره و رغباته و تنفذ له مطالبه.

التكرار: طبعاً المبتز لما بيلاقيك في النهايه إتنازلت ووافقت بيكرر ده في كل مواقفه معاك و نفضل في الدوامه دي و دوخيني يا لمونه الخلاصة إن المبتز ممكن يوصلك لمرحله إنك تتقبل حبه المشروط و إنه ممكن يلغي الحب ده فجأه في أي وقت يحبه.

تكنيكات خفيه بيستخدمها المبتز

1- يحسسك إنك أناني عشان بتطالب بحقوقك في العلاقة.
2- يطلعك مجنون و بتهذي و طلباتك مش منطقيه.
3- يخوفك بإنه يتحالف مع شخص له نفوذ عشان يطلعك غلطان {كبير في العيله ، إمام جامع ، أب كنيسه..}.
4- يجبرك تعتذر عن حاجات إنت أصلاً ماعملتهاش   { زيي إن يومه وحش ، مزاجه زفت ، مديره رخم عليه ..... }.
5- يلومك بإستمرار علي غلطات المحيطين بيكوا و كأنك السبب فيها و أساسها   يحسسك بالذنب و يأنب ضميرك علي الفاضية و المليانة.
6- يهدد بإيذائك أو إنه هيأذي نفسه أو هيأذي شخص عزيز عليك لو ما إستجبتش لطلبات

  تاني ماحدش هيجي يقولك بشكل صريح و مباشر و واضح مساء الخير يا فندم .. أنا ببتزك
 
أنواع المبتزين
1- المعاقبون
هيقولك إللي عاوزه منك ؛ و بعدها علي طول هيقولك إيه إللي هيحصلك و هيعمله فيك لو ماعملتش له إللي عاوزه منك و ده بيظهر بشكل كبير في { العدوانيه ، الغضب الأوڤر ، الصمت العقابي ....... }   لو فضلتي مكمله في شغلك ده ؛ هسيبك   لو صممت علي الطلاق ؛ مش هتشوف عيالك تاني.

2- المعاقبون لأنفسهم
بيهددوا برضوا .. بس بيهددوا بإنهم هيأذوا نفسهم ، أو إن رفضك لمطالبهم هيأذيهم   لو ما سلفتنيش فلوس ؛ أنا هتسجن   لو ما فضلتش عايش معايا ؛ أنا كده هموت لوحدي و ماحدش هيحس بيا   لو سبتني ؛ أنا هموت نفسي     هيلفوا و يدوروا عشان يوصلوا ليك إن الصعوبات إللي هيمروا بيها هي مسؤليتك إنت ..... و هما شطار قوي في ده بالمناسبه.

3- المعانون: بيحملوك مسئوليه معاناتهم ... و شغل صعبانيات فاخر من الآخر لدرجه توصلك إنك ما تبقاش فاهم إيه إللي بيدور في دماغهم و يتهموك وقتها بعدم الإهتمام   و الإهتمام ما بيطلبش     ما إنت لو كنت مهتم ؛ كنت عرفت لوحدك و كتيييييير من النكد .. جرعه مكثفه من البكاء .. مع رشه من الكآبه.

4- النصابين: شاطرين قوي في إنهم يلعبوا معاك لعبه #العصايه_و_الجزره هيغروك بالوعود و الآمال و الهدايا و الأحلام الورديه و في كل مره تقرب من الوصول تلاقي مشكله كبيره بسببهم تمنعك من الوصول .. لحد ما تكتشف إنك بتجري ورا سراب ... عَدم ... لا شيء
 
 
إزاي أتعامل مع الابتزاز العاطفي؟

1- إقرأ عنه كتير و إفهم عنه و عن ألاعيبه أكتر و أكتر ،
2- إكتب كل حاجه عن تفاعلاتك اليوميه مع المبتز ؛ الكتابه هتساعدك كتير و تحسن من صحتك العقليه و النفسيه.
3- حدد نقط ضعفك ؛ عشان ما يلعبش المبتز عليها و لأنها محاور قوه المبتز إللي بيضغط عليك منها.  
4- تجاهل دموع التماسيح ؛ ما تسمحش للمبتز يستعطفك بعياطه و إنفجاراته العاطفية.
5- إكسب وقت زياده ؛ المبتز في الغالب بيضغط عليك عشان ياخد إجابه فوريه أو رد فوري علي طلباته .. إطلب وقت تفكر فيه براحتك من غير توتر و ضغط.
6- حط حدود قويه ؛ مش هتقدر تتعامل مع المبتز إلا لما تحط حدود قويه واضحه ليك و ليه تحميك .. حط خط واضح و فاصل بين إللي تقدر عليه و تقبله و إيه إللي مرفوض بالنسبالك.
7- أطلب مساعده مُتخصصه ؛ لو كل إللي فوق ده مانفعش .. أطلب مساعده من مُتخصص نفسي سواء كان معالج أو طبيب

لمزيد من مقالات نور الامام اضغط هنا