📌📍المقال دا هيوجعك، وممكن يستحضر مشاعر تقيلة من الماضي؛ فلو مش جاهز ما تكمّلش قراية.لو بتوصف نفسك بإنك إنسان مش ملتزم، وبتسوّف كتير، حتّى لو بتعمل شغل أنت بتحبّه...فمبدئيًا كدا عشان نكون على نور مع بعض التسويف عرَض لمشكلة عميقة، لكن هو في حد ذاته مش المشكلة!هتلاقي كتير بيقولوا لك إن التسويف ممكن يكون تسويف بدافع: (الكمالية - القلق - التشتت - البحث عن متعة ودوبامين مش موجودين في المهمة اللي عايز تعملها - الخوف من الفشل - الخوف من النقد... إلخ)ودا كلّه مظبوط فعلًا، لكن برضو دا مش أصل المشكلة! يعني الكمالية دي جت منين؟ الخوف من النقد/الفشل جم منين؟ إدمان الدوبامين حصل ليه؟! دا يودينا لنقطة أعمق، وهيّ؛ تربيتك على الالتزام كانت إزاي؟ يعني هل أنت رابط بين الالتزام وبين الألم النفسي أو الجسدي أو الاتنين؟وهو دا بقى مربط الفرسلو قلت لك خد دقيقة كدا فكّر فيها إمتى أوّل مرّة بدأت تلتزم؟ يعني في الحضانة أو ابتدائي مثلًا وأنت بتلتزم ع المذاكرة، إزاي اكتسبت صفة الالتزام؟ ولو بدأت في الالتزام قبل كدا.. كانت إيه صورة الالتزام دا، واكتسبته إزاي؟ فكّرت؟ لاقيت إيه بقى؟لو أنت شخص مسوِّف، أو بتوصف نفسك بإنك غير ملتزم؛ غالبًا هتلاقي الفترة دي مضطربة جدًا، واللي هيّ أول فترة اتدرّبت فيها ع الالتزام، أيًا كان سنّك وقتها كان كام سنة.الطريقة اللي اتدرّبت بيها ع الالتزام زمان، هي اللي خلّتك دلوقتي يا إما شخص ملتزم، أو شخص مسوّف وغير ملتزم...لو الالتزام اقترن في دماغك وجهازك العصبي وجسمك بالألم، الحرمان، الضـرب، التوتر، الخوف، الفزع.. هتحاول دلوقتي تهرب من الالتزام بكل قوتك، حتى لو أنت مش فاهم أنت ليه بتهرب من الالتزام! عشان لو أنت ناسي على مستوى الوعي، جسمك ما بينساش، جهازك العصبي لا يغفر، ولاوعيك مخزّن دا كويس جدًا!طب والحل؟هات أصل المشكلة ع السطح، وخلّيك واعي بيه، دا جزء كبير من الحل، ودا البداية.بعدين بقى التفت للأعراض السطحية، وحلّها الموجود ع اليوتيوب وفي الكتب.بس الأهم.. إن زي ما دماغك ربط بين الالتزام وبين الألم، حاول تفك الربطة دي، واربط الالتزام بدوبامين.وافتكر إن أنت مش شخص مسوّف وغير ملتزم، لكن أنت شخص عنده نمط التسويف وعدم الالتزام، ودا مش قدَر ومكتوب على جبينك ولا هوّ صفة لازقة فيك، لإنك زي ما اكتسبت نمط سلوكي، تقدر تكتسب نقيضه عادي.ولو حاولت تحل المشكلة دي لوحدك وما قدرتش، افتكر إنك مش لازم تتعامل لوحدك، وممكن تحتاج تطلب مساعدة من متخصص.ابقى بخير لحد ما نتقابل في المقال الجاي! 🌿
