هقول ايه في أول جلسة علاج نفسي؟

أوقات كتير بيدور في بالنا..

إن أنا عايز أروح لمعالج نفسي عشان حياتي واقفة ومش ماشية، وحتى لمّا بتمشي.. من جوّايا أنا ما بكونش مرتاح، وحياتي تقيلة أوي على قلبي، لكن يبقى السّؤال: أنا مش عارف أبدأ منين؟!

هروح للمعالج أقول له إيه؟ عالجني؟ طب من إيه؟ أنا لو رُحت بيتهيّأ لي إني هقعد مش هكون عارف أبدأ منين ولّا أقول إيه، وهسكت!

Cut! 🎬

الحقيقة إن المعالج النّفسي أصلًا متعوّد إنّه الـpatient يقعد قدّامه ويسكت، ويقول له مش عارف أبدأ منين، والحقيقة برضو إن سكوتك دا هوّ دَخلة مهمّة جدًا للعلاج النّفسي؛
 ودا لإنّ هيبقى قدّامك سيناريو من الاتنين...

• يا إمّا المعالج هيبدأ يتدخّل وهيعرف هوّ يطلّع منّك الكلام وياخد history محترم منّك؛ عشان دي شغلته -ودا السيناريو الأشهر والغالب-.

• يا إما هيسيبك تسكت.

آه واللهِ! 😃
المعالج ممكن أحيانًا يسيبك ساكت وهوّ متعمّد دا، هوّ مش غرضه يعند معاك، ولا هوّ مش عايزك تتكلّم.. بالعكس، هوّ أصلًا مستنّيك تتكلّم وحابب دا وعنده استعداد ليه...
لكن السّكوت المتبادل بينكم.. لا إراديًا هيخلّيك أنت تغوص أكتر في نفسك، تتعمّق أكتر في مشاعرك وسلوكيّاتك وعلاقاتك، وتبدأ تفتكر آخر مشكلة ممكن تكون اتحطّيت فيها، أكتر صفة بتضايقك في نفسك، أو أكتر علاقة مأزّماك في حياتك.. دايمًا لحظات السّكوت بيتقال بعدها المشكلة اللي في الجون، المشكلة الأساسية اللي قارفاك في حياتك، واللي منها هتبدأ رحلة تغييرك.

وبكدا نبقى عرفنا أوّل مشكلة ممكن تقابل أيّ شخص عايز ياخد خطوة العلاج النّفسي، واللي هيّ مش مشكلة خالص يعني، وأحيانًا ممكن تكون ميزة وتساعدك أكتر في استكشاف نفسك في مساحة آمنة تقدر تكون (أنت) -على طبيعتك- فيها.

كتبت: الأخصائية النفسية مروة نور الدين. في 27 نوفبر 2023